MARÍA SOLINHA, ESTREA VERÁN 2020

 

O filme de Ignacio Vilar chegará aos espectadores de numerosos concellos medianos e pequenos de toda Galicia, Castela e León e Portugal

Dan man de Mr. Misto, empresa de exhibición cinematógrafica galega, 

MARÍA SOLINHA será proxectada ao aire libre en formato Cinema de verán e Autocine durante todo o verán 2020

A sétima longametraxe de Ignacio Vilar, MARÍA SOLINHA (Vía Láctea Filmes e TVG) será estreada en numerosos concellos de toda Galicia, Castela e León e Portugal entre os meses de xuño e setembro de 2020.

Neste verán atípico, o filme protagonizado por Grial Montes e Laura Míguez iniciará o seu percorrido de chegada aos espectadores con eventos de premier en Redondela e Cangas, localidades centrais da rodaxe, e coma estrea en Autocine en Verín:

– Venres 19 de xuño: REDONDELA

– Sábado 20 de xuño: CANGAS

– Domingo 21 de xuño: VERÍN (Autocine)

 

A partir destas datas, o filme comezará unha extensa e intensa andaina por toda Galicia, Castela e León e Portugal, neste caso (e de maneira inédita no cine) sendo presentada antes nas vilas medianas e pequenas que nas cidades, onde chegará ás salas unha vez normalizada a situación sanitaria.

Na rolda de prensa celebrada hoxe en CANGAS, berce de María Solinha e concello clave na produción do filme, anunciouse a proxección en ata 100 localidades, polo momento, xa que o calendario irá completándose nestas semanas).

 

MARÍA SOLINHA proxectarase en todos os casos ao aire libre ou en autocine, coas mellores condicións técnicas do mercado a cargo da experimentada empresa MR. MISTO, e con todas as medidas de seguridade esixidas pola actual realidade co COVID-19. (Aforo limitado, separación entre cadeiras, hixienización completa, mascariña obrigatoria, etc.).

 

Participaron na rolda de prensa:

 

Xoán Mariño, xerente de Mr. Misto, empresa de exhibición de cine.

Iria Rodríguez, de Gadis, colaborador neste proxecto de distribución.

Digna Rivas, alcaldesa de Redondela, localidade de rodaxe e concello que apoiou a produción.

Jacobo Sutil, director da AGADIC (Axencia Galega das Industrias Culturais)-Xunta de Galicia, con cuxa subvención contou a produción de MARÍA SOLINHA.

Carmela Silva, presidenta da Deputación de Pontevedra, entidade con cuxo apoio contou a produción do filme.

Xosé Manuel Pazos, alcalde de Cangas, localidade de rodaxe e concello que apoiou a produción.

Grial Montes, Laura Míguez, Santi Prego, Antonio Durán “Morris” e Mabel Rivera, principais actrices e actores do filme.

Ignacio Vilar, director.

 

 

MARÍA SOLINHA (Vía Láctea Filmes e TVG) contou coa subvención da Axencia Galega das Industrias Culturais (AGADIC)-Xunta de Galicia, e o apoio da Deputación de Pontevedra, Concello de Cangas e Concello de Redondela